DRC - UVIRA
Polisi Uvira Yatumia Bomu za Gesi Kusambaratisha Maandamano ya Waganga Wanaodai Mishahara ya Miaka 20 Bila Malipo Katika Mji wa Kivu Kusini
NOVEMBA 02, 2025
Polisi mjini Uvira imetumia bomu za gesi kusambaratisha waganga walioanza maandamano ya siku mbili katika mji huo wa Kivu Kusini, kuungana na waganga wengine wa DRC wanaodai kulipwa mishahara yao ambayo haijalipwa kwa karibu miaka 20.
Waganga wa hospitali za kiserikali na za kujitegemea katika mkoa wa Kivu Kusini wameanza mgomo wa siku mbili wakitaka walipwe mishahara yao. Wengine wanalalamikia kucheleweshewa mishahara ya zaidi ya miaka 19 pamoja na marupurupu yao.
Ni waganga kutoka tarafa nne zikiwemo za Uvira, Fizi, Mwenga na Shabunda.
Ni katika mji wa Uvira, ambao kwa sasa umehifadhi makao makuu ya Kivu Kusini baada ya Bukavu kuanguka mikononi mwa wanamapinduzi wa AFC M23.
Waganga walianza maandamano saa tatu asubuhi wakianzia eneo la katikati mwa mji, wakielekea kwenye makao ya gavana ili kuwasilisha risala yao.
Maandamano hayo yalivunjwa na polisi kwa kutumia mabomu ya machozi.
Mamlaka ya mji wa Uvira awali yalipiga marufuku kuendeshwa kwa maandamano yoyote mjini humo kwa sababu za kiusalama.
Maandamano haya yanaungwa mkono na mashirika ya kiraia, na yanaendeshwa na waganga katika maeneo mbalimbali ya DRC kuanzia mji mkuu Kinshasa.